La piscine

Ein ting eg vil berømme Frankrike for er at det er så billig å gå i svømmehallen. For ein symbolsk pris får ein plaske rundt med små franskmenn i små badebukser. Alle må ha på badehette, og det er litt fint, for alle ser like rare og uskyldige ut. Eg likar å sjå på dei som kjem ut i hallen, og kanskje føler seg litt bleike og slappe, korleis dei sjenert plumpar ut i vatnet og etterkvart løsnar opp. Og eg skal ikkje sei at eg ikkje ser på korleis herrane ser ut i dei små badetrusene sine. Det eg ikkje likar, er dei som plaskar veldig, for no er me i byen, me bur tett og svømmer tett, og då er det ikkje greit å plaske på naboen. Det beste er etterpå, når ein er ferdig og skal ta på seg skoa ved utgangen, og alle menna i mørke dressar står barfot i gangen. Då er dei søte.